ГҮЛМЭР

тэмд. н. залуу, залуухан, хонгор, гэнэн хонгор, бага, бэежээгүй (молодой, юный): Тэрэ буржагар үһэтэ дуушан ээлжээтэ олзоёо олобоб гэжэ хүхеэд, дурлаһан хэбэр үзүүлэсэгээн, гүлмэр басаганай сэдьхэл хүлгѳѳбэ гээшэ гү? (С. Цырендоржиев); гүлмэр залуу(хан) эдир залуу, хара бага, бэежээгүй (молодой, юный): Мэнэ һаяхана гүлмэр залуу хүбүүхэн ябаһан аад, мүнѳѳ хүсэ шадалаа нэмэһэн эрэ хүн зогсожо байба (А. Ангархаев); Гүлмэр залуухан басаганай урда бэрхэтэй хоёр харгы һалаатаад байна бшуу (Б. Санжин, Б. Дандарон); гүлмэр наһан, гүлмэр залуу (гү, али жороо) наһан 10–15 наһанай үе, үхибүүн наһан (отрочество): Ринчин үшѳѳл гүлмэр наһандаа ябана, хожом алдуу эндүүгээ ойлгоходоо, эхэдээ баяр хүргэхэ (С. Цырендоржиев); Тэрэ һайхан гүлмэр залуу наһаяа һанангүй яахабиб (Б. Мунгонов); Гүлмэр жороо наһанайнь эгээ һайхан хаһа энэ горхонтой таһаршагүй холбоотой ха юм (М. Осодоев); гүлмэр гэнэн (гү, али арюухан) хонгор гэнэн, мэхэгүй (юный, неопытный, наивный): Ахынь сэдьхэлдэ атаархалай багахан ошоной аһаашье һаань, гүлмэр гэнэн үхибүүн азатай байгша гэжэ баһа һанан шэбшээд, һанаагаа амараа һэн (С. Доржиев); Залуу хүбүүнэй гүлмэр арюухан сэдьхэл зүрхэндэ ехэл хүхюутэй, урматай баяртай ябана хэбэртэй (Б. Мунгонов); гүлмэр багахан (гү, али заахан) бага, бэежээгүй (маленький, неокрепший): Үшѳѳ гүлмэр багахан туладаа айха гээшые арайл мэдэнэгүйл гээшэ ааб даа (Б. Мунгонов); …эжынгээ үгыдэ сэрэгшын хубсаһатай ороһон дүрыень гүлмэр заахан зүрхэндѳѳ няагаад, уйдхартай гомдолтойгоор уйлахададаг һэн (Ц.-Д. Хамаев).