ГҮЛДЫЛГЭХЭ

үйлэ ү., идх. залог хүзүүгээ һунааха, ута болгохо, үлыхэ (вытягивать шею): Мүн баһа хойнохи үдхэн бургааһан сооһоо хүрибтэр хара томо амитан бултайжа, хүзүүгээ гүлдылгэн маряаһаар, малнууд тээшэ баахар-баахар гэшхэлбэ (Д.-Д. Дугаров); толгойгоо (гү, али тархяа) гүлдылгэхэ тархяа үлылгэхэ, хүзүүгээ һунааха (вытягивать шею): …Халзан нюдѳѳ ехэ болгожо, толгойгоо гүлдылгэн, шагнаһанай һүүлдэ, нюураа хуурайгаар уршылган, уйлахаяа һанаһанай маяг үзүүлнэ (Х. Намсараев); Харин хүрин азарга дүрбэн хүлтэ дээрмэшэдэй дүтэлһые мэдээд, тархяа доогуур гүлдылгэжэ, һалхинда һүүл дэлһэеэ хиидхэн, һүрѳѳтэйгѳѳр шононуудай урдаһаа добтолоод, һѳѳргѳѳ адуундаа гүйжэ ерэнэ (Б. Санжин, Б. Дандарон).