ѲѲРЭ I

1. тэмд. н. 1) онсо, тусхай, тусгаар, гайхамшаг, һонин (своеобразный, особенный, исключительный): Үргэн гудамжанууд ямар нэгэн ѳѳрэ гэрэлээр үдэр дунда гэрэлтүүлэгдээд байһандал яларна (Д. Батожабай); ѳѳрэ морин онсо һайн морин (замечательный конь); ѳѳрэ хүн онсо зантай хүн (своеобразный человек): ѳѳрэ байдал онсо байдал, тусгаар байдал (особенность); 2) шуран, абааштай, согтой, дорюун (бойкий, задорный): Теэд ѳѳрэ үгэлгэн һамгадай хэдышье альбан бэрхээр идхаа һаань… (Ш.-С. Бадлуев); ѳѳрэ һүбэлгэн (гү, али хурдан) шуран, абааштай, ѳѳдэргэ (бойкий, живой): Бүдүүрхүү галууд, ѳѳрэ хурдан тахяанууд энээгүүр тэрээгүүр иишэ тиишээ һүрэглэн субанад (Ч. Цыдендамбаев); ѳѳрэ хүбүүн шуран хүбүүн (бойкий мальчик): Эгээл тиимэ хѳѳрхэн, ѳѳрэ хүбүүн Дармажабайда түрѳѳ бэлэй (Б. Мунгонов); 3) ондоо, адли бэшэ, илгаатай (другой, иной): Үнэр заахан шоргоолзон үзэмжэлхэ нюдэгүйш бол, / Үдэһэн бутаяа алдажа, тэнэн тѳѳрин ошохогүй. / Үнэн сэдьхэлтэ хүниие үглѳѳ бүришье жэрбэдэбэл, / Үзэл һаналаа урбажа, ѳѳрэ замда орохогүй (Д. Улзытуев); ѳѳрэ юумэн хэрэггүй ондоо, бэшэ юумэн хэрэггүй (больше ничего не надо): Иимэ һайхан үргѳѳтэйб, / иимэ баян эдлэлтэйб, / иимэ мүнхэ галтайб. / Эжаа, эжы! / Ѳѳрэ юумэн хэрэггүй! (Д. Улзытуев); ѳѳрэ түрэлэй юумэн ондоо түрэлэй юумэн (инородное тело); ○ онсо гэжэ үгэтэй парн. хэрэгл.; 2. наречи онсо, тусгаар, илангаяа (особенно, исключительно, совершенно): Гар нюурынь үни модожон хаташаһандал, теэд нюдэдынь ѳѳрэ сэсэхэн галаар ялалзана (Ч. Цыдендамбаев); 3. дах. ү., хууш. монг. гадна, ондоо, энээн дээрэ нэмэжэ хэлэхэдэ (кроме, помимо): Һүүдэрһээ ѳѳрэ нүхэргүй, һүүлһээ ѳѳрэ ташуургүй.