ДУУҺАН

наречи 1) хүсэд, хуу, бултыень, дүүрэн (полностью, окончательно, совсем): Би тэрээнтэй уулзажа, нютагайнгаа һониниие дууһан дуулаһан байнаб (Ц. Дон); дууһан усадхаха бултыень һүнѳѳхэ, һалгааха, үгы хэхэ (полностью уничтожать): Ангуудые дууһан хюдахаяа газар бүри урьха, занга зүүнхэйт! (Д.-Д. Дугаров); дууһан хѳѳрэхэ бүхы юумэеэ нюунгүй хѳѳрэхэ (рассказывать всё без утайки): Яаралгүйгѳѳр Должон эхилжэ, Дэлэгэй хайшан гээд баригдаһые дууһан хѳѳрэжэ үгэбэ (Ц. Дон); дууһан худалдаха нэгыешье үлѳѳнгүйгѳѳр, хуу худалдаха (распродавать): Драмын, оперо-баледэй театрнуудта биледүүд дууһан худалданхай байбашье, кино харахыень тусгаар тэдэндэ орхиһондол, кассир һүүлшын хоёр билет таһалжа үгэбэ (Д.-Д. Дугаров); хэрэгээ дууһан бүтээхэ хэрэгээ дууһаха (окончательно улаживать дело): Үглѳѳгүүр эртэлжэ ерэһэн Балжаа баһа Гомбынгоо хэрэгээ дууһан бүтээжэ һалахые хүлеэжэ, коридор соо шалатараа һууһан байгаа (Ц. Дон); дууһан бариха уужархиха, хүнтэрүүлхэ – архи тухай (выпивать до дна): – Дууһан бариит, – гэбэ Балдан Нимаевич. – Ой, аргамни үгы. Архи уудаггүйб, – гэжэ тэрэ гараа арбагануулба (С. Цырендоржиев); һүни дууһан һүниие һэтэ, үглѳѳ болотор, үүр сайтар (ночь напролёт): – Һүни дууһан хүбүүдээр сэнгээ ёһотойш даа! (Д.-Д. Дугаров); ○ хуу гэжэ үгэтэй парн. хэрэгл.; 2) нэрэ үгын удхатайгаар булта, хуу (все без исключения; всё): Дууһан мүнѳѳдэрэйнгѳѳ ажабайдалаар, ажал хүдэлмэреэр сэдьхэлээ хананги, хүхюун дорюунууд янзатай (Ц.-Д. Хамаев).