ДОЛГИСОХО

үйлэ ү. 1) эбхэрэн хэлбэлзэхэ, салгидаха, долгитохо – гол, нуур, далайн уһан тухай (плескаться, волноваться): Долгисон урдана Зангисан, / Онгосом гүйнэл шуумгайхан (Д. Улзытуев); 2) найгалзан хүдэлхэ, хэлбэлзэхэ (колыхаться): Удангүй тэрэ зүгтэ набтархан шэрэнгиин орой долгисожо, хэнэйшьеб уухилха дуулдаад, Сунь Ян харагдаба (Ц. Цырендоржиев); 3) сэдьхэлээ хүдэлгэхэ, хүлгэхэ (волноваться): Энээхэн үедэ Шулуунай сэдьхэл айхабтараар долгисон байгаа һэн (Д. Эрдынеев); 4) абяанай шанга һула боложо дуулдаха, соностохо (доноситься волнами – о звуке): Аяар холоһоо, зэрэлгээтэ талын гүн дундаһаа буряад аялга долгисон зэдэлхэдэл болоод, дүтэлхэ тумаа бүришье хүсэтэйгѳѳр эбхэрэн мушхарба (М. Осодоев).