ДОБТОЛГО

юум. н. халдан оролго, дайлан оролго, дайлалга, дайралга (нападение, атака, налёт): Энэ добтолго хадаа ойн шушуурта хүсэд оборонодо орожо үрдеэгүй дайсанай артиллерийскэ дивизиие бута сохихо зорилготой байгаа (Ж. Тумунов); добтолго хэхэ а) халдан орохо, дайлан орохо, дайраха (нападать): Теэдшье Түшэгүүнэй эшээндэ добтолго хэхэ шалтаг үгы байһан юм (Б. Санжин, Б. Дандарон); б) зэмэлхэ, мохоохо, харааха (обрушиваться с обвинениями, упрёками): Эдэ түүхэшэд юугээрээ танай дура гутаагаад, та иитэрээ тэдээндэ добтолго хэнэ гээшэбта? (Ч. Цыдендамбаев); добтолгодо орохо а) дайсанаа дарахын тула сэрэгэй урагшаа хүдэлхэ (переходить в наступление): Добтолгодо орожо ябаһан дорюун советскэ офицернүүдэй, солдадуудай хүсэтэ уряа далайн долгин мэтэ хойно хойноһоо һубарин, зай забһаргүйгѳѳр зэдэлнэ (Ж. Тумунов); б) дайлагдаха, добтологдохо (быть атакованным).