ДАНГИНА

юум. н. 1) аман зох. аргагүй сэбэр, гоё басаган, аман зохёолдо гол геройн дүү гү, али һамган, үгышье һаа шэдитэ геройнуудай (жэшээнь, Хан Хюрмас тэнгэриин) басаган (красавица, фея): Үбгэн Жэбжээнэй мэргэнтэеэ уулзаад байһан Лабшалуугаа дангина шэнгеэр Лёнхобо басаган энеэн хэбтэтэрээ дороһоо һанаа алдаба (Ц.-Ж. Жимбиев); 2) шэлж. сэбэр басаган (красавица): – Сэбэр дангина, бидэнтэй хатархаяа яатараа арсаа юмши? – гэжэ хэнэйшьеб дураа гутан хэлэхые Насаг дуулаад, хажуу тээшээ хараба (Г.-Д. Дамбаев); Гоохон хатан дангина / Гоёшоожо нэрлэнхэй. / Урин даруу зангыень / Юунһээш ехээр сэгнэнхэйб (Д. Занданов); 3) түнх. одхон басаган, бүлын эгээ бага басаган (младшая дочь).