ДАГАХА

үйлэ ү. 1) дахаха, али нэгэн бодол, һургаал, суртаал гү, али ондоо юумэ баримталха (следовать кому-л., чему-л.): Эхэ эсэгэ хоёройнгоо хэлээшын али нэгые ойро абажа, али нэгэнэйнь заабариие шүтэн дагаха эрхэтэй болоо ха юм (Ч. Цыдендамбаев); 2) зубшаха, зубшан ябаха, һууха (протягиваться, направляться вдоль чего-л.): Үглѳѳдэрынь Хэрлэн голой эрье дагажа һууһан монгол айлнуудта хүрэжэ … танилсаһан байнабди (Х. Намсараев); Зѳѳдэлшэд элдин талын борохон тооһо хүдэлгэн, харгын гүйхэн бүхэнгые даган, ниилээдгүй удаахан ялхиба (Ц.-Ж. Жимбиев); 3) дахан үгүүлэхэ, хэлэхэ, дуулаха (повторять): Тиихэтэйнь адли гэр дотор байһан хүнүүд бултараа мүргэжэ, баһа зариманиинь даган дууряажа уншалсана (Х. Намсараев); даган баясаха ном хураха үедэ шажанай жаяг ёһоной дуу хамтаараа һүзэглэн дабтаха (вторить рефрену молитвы во время богослужения); даган дуулалсаха дуулажа байһан хүниие гү, али радио гэхэ мэтээр зэдэлжэ байһан дууе дахажа дабталсан дуулаха (подпевать): Үгышье һаа, үбгэнэй дуун таһалдашана аа гү гэжэ һанахаар уянгатай ута аялгануудтань гараараа зангажа байгаад, даган дуулалсаад абана (Б. Санжин, Б. Дандарон); даган дууряаха а) дабтан үгэлхэ, дуулаха (повторять чьи-л. слова, подпевать): Эдэ хоёр нүхэд гоё һайхан дуунуудые даган дууряаха дуратай юм… (Ц.-Ж. Жимбиев); б) дабтаха, һажааха (повторять какие-л. действия за кем-л.): …тэндэ һуугаашад бултаараа хүл дээрээ бодоод, даган дууряалдажа, мүн лэ юрѳѳһэнэй һүүлдэ духаряагаа уугаад һэн (Х. Намсараев).