ДАДАХА

үйлэ ү. дүршэхэ, һураха, таараха, эжэлхэ (привыкать, приучаться, адаптироваться): Иимэ эгсэ дурадхалнуудые гансал гражданска ажалда удаан ябажа тогтонижороод, тэрэнһээ һалажа, сэрэгэй шэнжэ маягтай шэнэ ажалда дадажа шадангүй байшана аа гүб гэжэ айһан хүн хэлэдэг (Ж. Тумунов); харанхыда дадаха нюдэнэй харанхыда юумэ хаража эхилхэ (привыкать к темноте): Хорон утаанһаа хордоһон нюдэеэ шабхаг шабхаг гүүлэн, бадаршанай һуухые гэрэй эзэн харанхыда дадаһан нюдѳѳрѳѳ тодохоноор хаража һууба (Д. Батожабай); (шэнэ) байдалда дадаха шэнэ оршондо, эрхэ нүхэсэлдэ таараха, дадаха (привыкать к новому положению, осваиваться): Түрүүшээр ербэдээд, аалин номхоноор байһан багашуул, байн байн энэ байдалдаа дадажа, шууяа татажа, носолдожо эхилбэ (С. Цырендоржиев); Үргэн талын унаган, омог дошхон Сабидар шэнэ байдалдаа зааха дадажа, үргэхэ хирэхэнь үсѳѳн болоо (Ц. Шагжин); ажалда дадаха ажалайнгаа оншо олохо, ажалдаа орохо (втягиваться в работу): Шэнэ түрүүлэгшэ даб гэһээр ядалдаа, тиигэһээршье ажалдаа дадажа, колхозоо яһалал һайнаар хүтэлбэрилэн ябана (Ц.-Ж. Жимбиев); бэе бэедээ дадаха бэе бэеэ һайнаар мэдэжэ тааража эхилхэ (привыкать друг к другу): Тэрэ гэһэнһээ хойшо үдэшэ бүхэндэ тэдэ хоёр уулзадаг боложо, бэе бэедээ дадажа эхилээ (Ц. Шагжин); дадаха эжэлхэ һураха, таараха (привыкать): Гурбан һара сугтаа байжа, бэе бэедээ дадаһан эжэлшэһэн нүхэд халуунаар амаршалалсажа, гараа барилсаад, тарана (Ц. Дон); дадаха дүжэрхэ юумэнһээ хашаржа хамаагүй болохо, урагшаа даб гэхэеэшье болихо (становиться флегматичным, невосприимчивым): Гэбэшье иимэ шэхэ дүлиирүүлмэ хүгжэмдэ Барга-Няма хоёр жэл соо дадажа дүжэржэ үрдиһэн янзатай, оройдоо убайлнашьегүй (Б. Мунгонов).