ДҮЛИИРХЭ

үйлэ ү. 1) дүлии болохо, шэхээрээ юумэ соносожо шадахаа болихо (глохнуть): Арбан долоон жэлэй туршада түмэр гэнжын ханхинаанһаа минии шэхэн дүлиирхэ болоо (Д. Батожабай); 2) бүглэрхэ, манарха (быть оглушённым): Гэнтэ тэрэнэй досоо юуншьеб таhархадал гээд, агшан зуура нюдэнэйнь харасын гэрэл унтаржа, шэхэниинь дүлииржэ, толгойнь эрьеhээр даашагүй туулган хүндэ болон мэнэршэбэ (Г.-Д. Дамбаев); 3) шэлж. ямаршье юумэндэ хамаагүй, һожоргүй болохо, хамаархахагүй (быть безучастным, ни на что не реагировать): Гомбын дотор, нэгэ мухар һэжэг түрэһэн шэнги, аягүй боложо, сэдьхэл бодолынь дүлиирнэ (Ц. Дон).