ДҮЙ I

юум. н. дадал, хадуугдажа абтаһан шадабари, һураһан шадабари (опыт, навык, сноровка): Тиимэ журамгүй, хүндэ класстай хүдэлхын тула ехэ дүршэл хэрэгтэй, харин намда хоёр-гурбаһарын практикаһаа бэшэ юуншье байхагүй, тиигээдшье үхибүүдтэ үгэеэ дуулгаха тусгаар дүй, шадабари байха ёһотой (Ц.-Д. Хамаев); дүй дүршэл ямар нэгэн ажал, үйлэ хэхэдээ мэргэжэһэн, дадал болоһон шадабари, онол (опыт, сноровка): Гэбэшье ганса эрмэлзэл бага ха юм даа, үшѳѳ дүй дүршэл хэрэгтэй (Ц.-Ж. Жимбиев); дүй дүршэлтэй ямар нэгэн ажал хэрэгтэ дүршэлтэй бэрхэ, шадабаритай (опытный, умелый): Тэрэ нэгэтэ бэшэ алта бэдэрэлгэндэ хабаадалсаһан, дүй дүршэлтэй хүн (А. Ангархаев); дүй дүршэл халан абаха дадал болгохын тула hураха, хүнһѳѳ ямар нэгэн ажал хэхэ арга шадалынь хадуужа абаха (перенимать опыт): Республикынгаа түрүү һаалишадай дүй дүршэл халан абаха тухай удаан хѳѳрэлдэнэ (Ц.-Ж. Жимбиев); дүй дүрэгүйгѳѳр шадабари багатайгаар, дүршэлгүйгѳѳр (неумело, неловко): Харин үглѳѳнь гурбан килограмм шэгнүүртэй, хүри улаахан шарайтай, хаб хара үһэтэй хүбүү асаржа үгэхэдэнь, тэрэниие ехэл дүй дүрэгүйгѳѳр тэбэрин абаад, хоёр хүхѳѳрѳѳ хооллуулхадаа ѳѳрымни түрэһэн юумэн гэжэ үнэншѳѳ бэлэй (Ц.-Ж. Жимбиев); дүй нааргүйгѳѳр шадамар бэшээр аад, хайша хэрэгхэнээр (неаккуратно, небрежно): Тиигэһээр лэ аблуулшаһан мэтээр нэгэ газартаа тогтохоёо болихоб гэжэ хүбүүнэйнгээ хажууда дүй нааргүйгѳѳр угжыень амандань хэжэ һуухадаа һанаагүй… (А. Ангархаев).