БУРУУЛХА I

үйлэ ү. 1) тэхэрихэ, зугадаха, тэрьедэхэ (отступать, обращаться в бегство); 2) муу тээшээ хубилха, ондоо болохо (меняться); зангаа буруулха зангаар муу болохо, зангаа хубилха, зангаа харуулха (портиться – о характере): Энэ түрүүлэгшэтнай зангаа буруулһан хүн байна (Ж. Тумунов); тэнгэри буруулха байгаалиин байдалай муу тээшээ хубилха (меняться – о погоде): «Шүдхэр абаг, баһа тэнгэри буруулхань ха, хүлни шархирна» гэжэ хэлэжэрхин алдаад… (Ж. Тумунов); 3) урбаха (изменять): Хамаг юумэн буруулжа байна. Ямар һонин юм? Энэ дүлии байгаалишье хүрэтэрѳѳ намһаа, хүн нэрэһээм арсажа эхилбэ гээшэ гү? (С. Цырендоржиев); аза (талаан) буруулха талаан буруутаха, урагшагүйдэхэ, һал һууха, гэнэдэхэ, хооһон һалаха (терпеть неудачу, не достигать успеха): Удаань аза буруулаа һэмнэй даа: гурбан жэл шахуу зэмэтэнэй колонидо байгаа (Д.-Д. Дугаров); Хүбүүниинь барилдаад, аза талааниинь буруулаа юм һэн гү, али яабашье гар дарагдаха байгаа юм һэн гү, хоёр бүхые орондог шарбуулһан аад, гурбадахи хүбүүндээ хүмѳѳ барюулжа, унажа һалаа (Ц.-Д. Хамаев).