БОДОЛГО

юум. н. 1) бодомжо, ойлгомжо, һанаан, һанамжа (соображение, рассуждение, мнение): Тиигээд лэ үзэл суртал хадаа гол ажалда, ажахын ябуулгада нүлѳѳлхы, туһалхы үүргэтэй гэһэн бодолго ерээд, одоол мэгдээб (Ц. Цырендоржиев); бодолгодо хатаха (гү, али абтаха, дарагдаха) бодолдо эзэлэгдэхэ, һанаагаа табиха (быть погруженным в думы): Бодолгодо хатажа, уруу дуруу болоһон Должон түргѳѳр ябаһан поездын нэгэ жэгдэ доһолоондо дууража, һажан алдана (Ц. Дон); Тэдэ хоёрой урда урдаһаа харалсаад, бодолгодо абташанхай байтар үүдэ гэнтэ тоншобо (Д. Эрдынеев); Мархай залуу хүн хоёр сортоотой түргѳѳр холодон ябаһан хүгшэнэй хойноһоо харан, аниргүй бодолгодо дарагдан һуунад (Ц. Шагжин); 2) тоо б. тооложо гаргалга, тоололго (вычисление, решение); тоо бодолго а) тооложо гаргалга (счисление); б) арифметикэ, эхин классуудай тоо бодолгын хэшээлэй нэрэ (арифметика): Энэ һургуули тэрэ үедѳѳ һайнда тоологдодог, илангаяа тоо бодолгын хэшээлнүүд шалгаран гарадаг байһан (Д. Цыбенова); 3) бодолго гүрэнэй дотоодо, гадаада харилсаанай талаар гүрэнэй засаг, нам гү, али ниитын бүлгэмэй ажал ябуулга (политика): Теэд һаншагаа сайһан намда ямаршье хүлисэл үгы хэбэртэй. Гансал хэлэхэ юумэмни гэхэдэ, манай гүрэнэй бодолго иимэрхүү байгаа (Д. Бальжинимаев); ажаллагшадые бүридхэлгын бодолго эмхиин, эмхи зургаанай хүдэлмэрилэгшэдые ажалай зүг шэглэл, зорилго болон заршамуудтай зохилдуулан бүрилдүүлхэ бодолго (кадровая политика): ехэ һургуулиин ажаллагшадые бүридхэлгын бодолго.