БАЖУУХА

үйлэ ү. 1) юумые шангаар бариха, дараха, шахаха, нидхэрхэ (сжимать, сдавливать, стискивать, комкать, мять, выжимать): Тиигээд юушье дуугарангүй, малгайгаа гамгүй, уршытарнь гартаа бажуужа, аалихан үүдэн тээшэ ошобо (К. Цыденов); Норошоһон халаадайнгаа хормойе бажууһан бэеэрээ, тамхияа гарган орёобо (Ц.-Ж. Жимбиев); биса бажууха бала бажууха (расплющить): Хоолойень биса бажуужа Худаг руу шиихагты! (Ц. Шагжин); толгойгоо бажууха хоёр гараараа толгойгоо бариха (хвататься за голову): Николай толгойгоо бажуугаад, тохоногоо үбдэгтѳѳ тулган, уруугаа хараад һуушаба (С. Доржиев); талха бажууха гурил уһанда худхажа, даража, ниилүүлхэ, хатуу болгохо (месить тесто); сэдьхэл зүрхые бажууха сэдьхэлые зобоохо, амар заяа үзүүлхэгүй (бередить душу, не давать покоя): Айдайн досоо уйтай, ямар нэгэн юумэн тухай һанаа үнѳѳн сэдьхэл зүрхыень бажуужа байгаа һэн (С. Доржиев); 2) шэлж. хуян тарааха, эльбэхэ, нидхэрхэ (массировать): Тиигээд шархиран яншаhан үбдэгѳѳ бажуужа оробо (Г.-Д. Дамбаев).