БАРХИРХА

үйлэ ү. 1) хүнэй уйлаха, орилхо, хашхарха, хуугайлха (плакать навзрыд, реветь): Иимэ мандагар томо хүн аад лэ, иимэ жаахан борбогорхон хурьганһаа айгаад, бархиржа байха гэжэ яагаа эшхэбтэр юм? (Б. Мунгонов); 2) амитанай эрхирхэ, хүрхирхэ, бүрхирхэ (кричать, реветь – о животном): Тиин тэрэнэй буугайнгаа шабха дарахалаар, олиггүй муухайгаар баабгайн бархирха дуулдаба (Б. Санжин, Б. Дандарон); Гэнтэ элжэгэнэй бархирха абяан халта соностоод, гэрэй һууриин шэнээхэн тэбтэг дээрэ зон үймэшэнэ (Д. Батожабай); 3) бахын абяа гараха (квакать – о лягушке): Нуур соо баханууд бархирна; 4) хирээгэй хаагалха (каркать – о вороне): Баярлаһан хирээ бархирба гэһэндэл, эхэнь нюдэнэйнгѳѳ уһа сагаахан пулаадайнгаа шэгшэгээр аршан һуугаа һэн (Ц.-Д. Хамаев); ○ орилхо, уйлаха гэжэ үгэнүүдтэй парн. хэрэгл.