БҮТҮҮЛХЭ

үйлэ ү., идх. залог юумэ хааха, халхалха, дүүргэхэ, таглаха, оёхо (заделывать, закрывать, закупоривать, зашивать): Гүсын хабхагаар даража, түхэреэн түхэреэнээр абаhан хабтагар талхан дээрэ татаhан мяха хээд, хумин бүтүүлээд лэ, хабтагай дээрэ жэрылгэн табина (Г.-Д. Дамбаев); Хармаамни соорошоо, бүтүүлжэ үгыш (З. Гомбожабай); нюураа бүтүүлхэ нюураа хааха (закрывать лицо): Гараараа нюураа бүтүүлээд, дала мүрѳѳ татагануулан, тэрэ хоолой дүүрэн уйлаба (С. Доржиев); шэхэ бүтүүлхэ шэхээ альгаараа хааха, хургаараа бүглэхэ (зажимать уши): Тиихэдэнь Балжид нэгэ гээ һаа гараад ябашадаг, үгышье һаа гэрэйнгээ ондоо таһалга уруу ороод, гараараа шэхэеэ бүтүүлээд һуудаг байгаа (Ц.-Д. Хамаев); амаа бүтүүлхэ гараараа амаа хааха (закрывать, прикрывать свой рот): Мантаг тагшатай архи нэгэ амяар гудамхяад, даб дээрэ амяа абажа яданхай, нюдаргаараа амаа бүтүүлээд, бүгтышэнхэй һууна (М. Осодоев); үриеэ бүтүүлхэ үриеэ түлэхэ (покрывать свой долг).