АЖАЛАЙ

тэмд. н. 1) ажалда хабаатай, ажалаар бүтээгдэһэн, бии болгогдоһон (трудовой, производительный, рабочий): Дайнай хүндэ үе байһан дээрэһээнь ажалай һалбари бүхэндэ дутагдалнууд газар дороһоо гараһан лай мэтэ бии болоод лэ байна (Ж. Тумунов); ажалай журам ажал дээрээ сахигдаха дүримүүд (трудовая дисциплина): – Бидэнэй дунда ажалай журам эбдэдэг, һэбхи хүнгэн ябадалтай, архи тамхи эрьюулдэг хүнүүд үгы болоо (Ц.-Ж. Жимбиев); ажалай дэбтэр а) хүнэй хүдэлмэрилһэн газартань эзэлжэ ябаһан мэргэжэл тушаал тухай, мүн урмашуулганууд болон хэһээлтэнүүд тухай бэшэгдэхэ албанай дэбтэрхэн (трудовая книжка): Хожом ябаха гээ бол харгын захиргаанһаа ажалайнгаа дэбтэрые абахада хүнгэн байха гэжэ саагуураа баһа бодоно ха юм (Д.-Д. Дугаров); б) һурагшадай бэеэ даажа хэхэ даабаринуудтай барлагдамал дэбтэр, ном (рабочая тетрадь); ажалай тоосоон оршо гаршаяа тааруулһан, ажалаа хүтэлхэ арга (хозяйственный расчёт): Ажалай тоосоондо орохо һэмди гэжэ дугташалдана байна гү? (Ж. Балданжабон); Ажалай Улаан тугай орден Зүблэлтэ засагай үедэ ажал хүдэлмэридѳѳ айхабтар габьяа харуулһан хүниие, ажахыешье, мүн эмхи зургаануудые шагнадаг байһан орден (Орден Трудового Красного знамени): Тэрэ 1936 ондо Кремлиин ордон соо Михаил Иванович Калининай гарһаа Ажалай Улаан Тугай орден абажа байһанаа элихэнээр һанаадхиба (С. Цырендоржиев).