АЗА I

юум. н. зол, жаргал, хуби (счастье): – Халуун эдеэн дээрэ ороһон хүн аза ехэтэй юм! (Д. Батожабай); аза талаан тушаалдаһан зол (удача): Ганса хүнүүдэй оролдосоһоо бүтэдэггүй, аза талаанһаа, сагай уларилһаа дулдыдадаг ажал шуу (С. Доржиев); аза талаантай золтой, жаргалтай, урагшатай (счастливый, удачливый): Ямар аза талаантай хүнэй үхин һамганиинь болохонь гээшэб? (Ц.-Д. Хамаев); аза талаангүй золгүй, талаангүй, аза муутай (несчастливый, незадачливый): Теэд ангууша бэшэ һэн хойноо, аза талаангүй һэн хойноо хайшан гэхэбши даа? (Б. Мунгонов); азаар, аза (талааниинь) боложо урагшатай, һайн, талаан боложо (по счастью, к счастью): Тэрэ үедэ хүлѳѳ гэмтээһэншни болоо, тэрэш минии азаар тохёолдоо бшуу (Д.-Д. Дугаров); Ангуушанай аза боложо, урда шэлын хүтэл хаража гараа (Д.-Д. Дугаров); аза талааниинь буруулха урагшагүй, талаангүй байха (терпеть неудачу): Аза талааниинь буруулжа, гараа хухаршаба ха юм (С. Цырендоржиев); аза жаргал үлзы жаргал, зол жаргал, һайн һайхан (счастье): Эмнин байгаа мүшэмнай аза жаргал үреэнэ! (С. Доржиев); аза жаргалтай а) үлзытэй, золтой (счастливый): Хойноһоонь харан харан, үдэшэжэ байхадань, Сэпэлэй һанаһан һанаан, бодоһон бодол аза жаргалай дуун боложо ниидэһэн мэтэ (З. Гомбожабай); б) золтойгоор, үлзы һайхан жаргал эдлэжэ (счастливо): Баян, үгытэй гээд илгараад байһан энэ сагта аза жаргалтай ажаһуужа байна гүбди? (Н. Бальжинимаева); аза хуби (гү, али заяан) талаан (счастливая участь): Аза хуби байбалнь, амиды мэндэ гарана бэзэб… (Х. Намсараев); Хайрата инаг шамтаяа хамтарха аза заяангүй байhандаа гэмшэнэб (Г.-Д. Дамбаев).