АРМАГ I

юум. н. ямар нэгэн юумэнэй араг, торхо, яһан бэе (остов, каркас): Баруун гар тээнь шулуугаар армаг хээд, ханыень шэллэжэрхиһэн дүрбэн дабхар булай гоё байшан наранда толотоно (С. Цырендоржиев); гэрэй армаг гэрэй торхо (сруб дома): Би тэрэ һургуулииншни гэрэй армаг болон сонхонуудтань булай гоё һиилүүр, угалза гаргаха байгааб (Ц. Шагжин); тэргын армаг юумэ ашахын тула тэргын түхеэрэлгэ (короб, кузов телеги): Тэргын ута армаг нахиишатар дараһан обогор улаан юумэн харагдахадал гэбэ (Д. Батожабай); машинын армаг юумэ ашахын тула машина дээрэ хэгдэһэн түхеэрэлгэ (кузов машины): Алаг бүһэтэй машинануудта армаг дүүрэн ашаад (Ц.-Д. Дондокова); велосипедэй армаг велосипедэй бүхы хубинуудые ниилүүлдэг гол хуби (рама велосипеда): …велосипедэйнгээ армагта аса, тармуур уянхай задарюун сэбэр бэетэй хүбүүн харагдаба (С. Цырендоржиев).