АНГИ

юум. н. 1) түүхэтэ ёһоор бүрилдэһэн ниитын үйлэдбэридэ тусхай байдалтай, ажал эмхидхэлгэдэ тусхай үүргэтэй, үйлэдбэриин хэрэглэлдэ, ниитын баялигые хубаалгада хуулита ёһоор хабаададаг, адли зорилготой олон тоото хүнүүд (класс): Хорёод, гушаад онойхидол ангинуудай хоорондо бэшэ, хүнүүдэй хоорондо, ажабайдалай талаар хоёр ондоо үзэлтэнэй хоорондо хилэ гараба (Б. Мунгонов); эзэрхэгшэ анги зонхилжо байһан ехэ бүлэг зон (господствующий класс): Мүнѳѳ үедэ бүхы капиталистическа оронуудта эзэрхэгшэ ангинууд … мухар һүзэг дэлгэрүүлэн бэхижүүлхэ гэжэ али болохоор оролдоно (Х. Намсараев); 2) бэе бэедээ харша гү, али зүрилдѳѳтэ, бэе бэетэйгээ мүрысэгшэ бүлэг хүнүүд (группировка): Теэд арбаад гаран үхибүүдэй хоёр анги боложо, иишэ тиишэнь шэдэһэн юумые һѳѳргэнь обоолхо бэлэн бэшэ даа (Ц.-Ж. Жимбиев); анги можо уг гарбалараа гү, али ямар нэгэ шалтагаанһаа бүлэгүүд боложо хубаарһан зон (группировка): … хальбангууд, галзуудууд гэжэ али бүхы түбһэн юумэ дээрэ анги можо боложо, хүйтѳѳр харалсажа ябана ха юмбибди (Х. Намсараев); 3) һуралсалай газарта һурагшадай, мүн дасангай һургуулиин шабинарай (хубарагуудай) хубаарил. Дунда һургуулида ехэнхидээ 25-30 үхибүүд, хүдѳѳгэй һургуулинуудта хоёр-гурбанһаа эхилээд, зарим холын һургуулида нэгэшье үхибүүн амяараа анги болодог (класс в школе, курс в буддийском университете): Мүн дасанай ламанаршье хоёр анги боложо эхилбэ (Ц. Шагжин); анги дамба будд. һуралсажа байгаа зиндаагаараа ном хаялсаад илагша (победитель в диспуте).