АМТАТАЙГААР

наречи 1) хорхой хүрэмѳѳр, дура хүргэмѳѳр (вкусно): Эжымни ехэ амтатайгаар саламат шанадаг (Ч. Цыдендамбаев); 2) амтархан, амта мэдэн, тамшаажа (аппетитно, со смаком): Үбгэн аба альган соогоо нэгэ юумэ адхан, тэрэнээ амандаа хээд, амтатайгаар жажалжа оробо (Ц.-Ж. Жимбиев); Моридто энэ үдэр нэмэлтэ обёос үгѳѳ ха, турьясагаалдан, амтатайгаар жажалхань холо хүрэтэр дуулдажа байба (З. Гомбожабай); 3) зохидоор, аятайханаар (приятно, с удовольствием): Иимэ бүхѳѳр, иимэ амтатайгаар унтаһанаа Дэлгэр үнинэй һананагүй (В. Гармаев); Үшѳѳ нэгэ үдэр үргэһэ нойр мэтэ амтатайгаар үнгэршэлэй (З. Гомбожабай); амтатайгаар һуняаха аятайханаар һуняаха (потягиваться с удовольствием): Сайгаа бутаргажа дүүргээд һуутарнь, отог сооһоо Цыден-Жаб гаража, амтатайгаар һуняагаад, түүдэг тээшэ ерэбэ (В. Гармаев).