АМБААР

юум. н. 1) үбэлэй хубсаһа болон эдихэ хоолоо, ажаһуудалайнгаа хэрэгсэлнүүдые хадагалдаг сонхогүй барилга. Шадалтай баян айлнууд хэдэн амбаартай байдаг һэн. Үбэлжѳѳндѳѳ газар дээрэ баригдаһан амбаартай байхаһа гадна, зѳѳхэдѳѳ абажа ябадаг тэргэ амбаартай байгаа (амбар): Колхозой хэдэн зуун малай багтажа хонохоор тон ехэ амбаар соо зай талагүйгѳѳр мэшээгүүдтэй гурил обоолоотой байба (Б. Шойдоков); Амбаар хэдышье ехэ һаа, дүүрэдэг (Оньһ. ү.); 2) захаам. хужартай газарта гү, али дабһа адхаһан газарта табигдаһан ангуушадай урса гэрхэн (шалашик охотников); 3) шоно болон бусадшье ан барихын тула хэгдэһэн модон занга (амбар-западня): …хамтадаа долоон шандага урьха зангануудһаа суглуулжа абаад, шонын амбаарта ошоходонь, нэгэ шоно һаяхан ерэжэ ороод хаагдашанхай… (Б. Базарон); 4) хүүргын бүдүүн тулга (бык, опора моста).