АЛХА II

1. юум. н. юумэ хадахада гү, али сохиходо хэрэглэгдэдэг богони эшэтэй булсуу түмэр зэмсэг (молоток): Тиигээд лэ тэрэ гэртэхи газаахияа жэншэд гүүлэнгүй, алха, хюрѳѳ, һүхэ барихаһаа эхилээд, эрэ хүнһѳѳ дутуугүй ажаллаа (Ц.-Ж. Жимбиев); алха дүшэ түмэрѳѳр юумэ дархалдаг хэрэгсэлнүүд (молот и наковальня): Хэдышье аргаашагаар тоншоходонь, шортоо, алха дүшэнь нѳѳхил шэхэ дүлиирмээр шэнхинэнэ, ханхинана хэбэртэй (Б. Мунгонов); туйбын алха туйбын газаашаа ёдойһон хубинь (элемент женского волосяного убранства): …хоёр шэхэнэйнь араһаа модон туйбын алханууд һэрхылдэнэ (Ж. Балданжабон); 2. элирх. үүргээр хэрэгл. алхада адли түхэлтэй (похожий на молоток); алха тобшо хоёр сантиметр тухай утатай, тэгэн дундаһаань гараһан гагнамал бүтүүтэй, гонзогор (цилиндр) түхэлтэй, шудхамал мүнгэн тобшо (пуговица цилиндрической формы из литого серебра).