АЛДУУ

юум. н. эндүү, эндүүрэл, буруугаар хэгдэһэн ажал хэрэг, ухаан бодол (ошибка): «Алдуу гээшэтнай нүгѳѳ талааһаа ами наһан гээшэ» гэжэ хэлэхэ гээд, хэлэбэгүй (З. Гомбожабай); алдуу хэхэ (гү, али гаргаха) эндүүрхэ, буруу юумэ хэхэ (совершать ошибку): «Бүдэрѳѳгүй морин, алдуу хээгүй хүн дэлхэй дээрэ үгы ёһотой даа», – гэжэ хүгшэн абам хэлэхэ дуратай байдаг (Ц.-Д. Хамаев); Элдэб юумэ тархидаа оруулаа һаа, алдуу гарганаш (Ц. Цырендоржиев); алдуугаа мэдэрхэ алдаһанаа, эндүүрһэнээ ойлгохо (сознавать свою ошибку): Светлана мэдэхэ һэн тула алдуугаа мэдэржэ, Ринчиндэ харуулангүй нүхэр басагандаа эмнеэд, яарашаба (С. Цырендоржиев); алдуугаа заһаха буруугаа зүб тээшэнь болгохо (исправить ошибку): Уурал гамналган тухай үлүү үгэ алдаһанаа тухайлан, энэ алдуугаа заһаха гэжэ, тэрэ гуйжа найжа оробо (Ц.-Ж. Жимбиев); алдуу эндүү буруу хэһэн юумэн (ошибки, упущения): Тиигэхэ хоорондоо наһанайнгаа үндэрһѳѳ алдуу эндүүгээ хаража, ямаршье гүлмэрхэн, тэнэгхэн ябаа һэнбиб даа гэжэ шаналжашье болохо (Ц.-Д. Хамаев); алдуу дутуу а) дутагдалнууд, эндүүнүүд (упущения, недостатки): Магад та, хүндэтэ Радна Самбилович, алдуу дутууемнай хадхажа, һургаал ухаа заажа үгэнэ ааламтаа? (Б. Мунгонов); б) буруу, хүсэд бэшэ (ошибочный, недостаточный): Зааханшье алдуу дутуу, буруу юумые үзэн ядадаг болгохо ёһотойбди (Ц. Шагжин); хүлисэшэгүй алдуу ехэ, голхормоор эндүүрэл (непростительная ошибка): Намсараевта адли хүнүүдтэ хүтэлбэриеэ үгѳѳ һаа, хүлисэшэгүй алдуу хэхэеэ байнабди (Д. Эрдынеев).