АДХАХА II

үйлэ ү. 1) үйрүүлхэ, үбэнүүлхэ, бутарган тарааха (рассыпать, высыпать): Дүхэриг зоной дундаһаа хашарһа мүнгэ адхажа байһан шэнги жэнгинээн соностоно (Д. Батожабай); 2) гоожуулха, салгидуулха, халяаха (проливать): Эндэһээ мордоходоо, нэгэ шэл Волга мүрэнэй уһа абаашажа, Зэдэ Сэлэнгэ хоёрой уулзадха дээрэ адхахаб (Ч. Цыдендамбаев); хүлһэ адхаха ехээр хүлэрхэ, хүлһэ гоожуулха (проливать пот): Бүхэли оролго үбһэ сабшаһан хүнүүд мэтэ тэрэ хоёр уухирганад, хүлһэ адханад (С. Цырендоржиев); улаа адхаха шуһаа гоожуулха (проливать кровь): …хүбүүнэйнгээ бушуу түргэн хүсэндэнь һэжэгдэжэ, богоһоёо мүргѳѳд, улаа адхан унашана (Х. Намсараев).