АБИРТАХА

үйлэ ү. 1) бэрхэ байдалда орохо, тухашарха, бэрхэшээлтэй ушарха (быть в затруднении): Энэ колхозой абиртаһан ябадал ажалша зонһоо бэшэ, артелиин түрүүлэгшэһээ болоо (Ж. Тумунов); 2) зобохо, тулиха (страдать, мучиться): Тэдэ абиртаһан хонидоо хашаанууд соо хаажа гарасалдаа болобобди (Ц.-Ж. Жимбиев); 3) ядарха, үлбэртэхэ, шэмхэлүүртэхэ (недомогать): Арьяшка абиртаһан янзатай аргаахан бодобошье, нүгѳѳдынгѳѳ урдаһаа алхалба (Д.-Д. Дугаров); Абиртаһанай амин дээрэ, айһанай һүнэһэн хээрэ (Оньһ. ү.); 4) аягүйрхэхэ, мэгдэхэ, түдэгэсэхэ (смущаться): Тэхэ ямар нэгэ гэм хэһэн үхибүүн мэтэ абиртажа, анзаһантаяа носолдон байба (Б. Санжин, Б. Дандарон).