ТЭЭХИ

тэмд. н. ямар нэгэн газарта гү, али сагта болоһон, байһан (происходящий где-л., когда-л., находящийся где-л.): Чэмэдэй хүндэлэн модо дугысажа ябатарынь, горхоной саада тээхи шугы соо хэрзэгы эрхирээн дуулдаад, зуг татан зогсошобо (Д.-Д. Дугаров); зүүн тээхи зүүн зүгтэ байһан (восточный, находящийся на востоке): Зүүн тээхи Юрьев жалга руу нюдөө табихадань, хонидынь ногоо һайнтай шэнэ бэлшээри дээрэ хүдэлэнгүй бэлшэшэнхэй (Б. Мунгонов); досоо тээхи досоо байһан, досоохи (внутренний, находящийся внутри): Балагаанай досоо тээхи дэбдигдэһэн хүбхэн дээрэ үлэһэн мүрнүүдээр тухайлхада, эндэ гурбан хүн ажаһуугаа (В. Гармаев); хажуу тээхи хажуудахи, ойро байһан (находящийся рядом, близлежащий): Тэрэнэй жолоошон һууриһаа дурагүйгөөр буужа, хажуу тээхи капот хабхагыень нээгээд, халуун шэрэмдэ хайруулхаһаа айһан юумэдэл зогсобо (Ц.-Ж. Жимбиев); дасан тээхи харгы дасан руу ошоһон харгы (дорога в сторону дацана); дайнай хойшо тээхи байдал дайнай һүүлээрхи байдал (послевоенное положение); тарилгын урда тээхи хүдэлмэри тарилгын урда хэгдэдэг ажал (предпосевные работы); hунгалтын урда тээхи суглаан һүнгалтаһаа түрүүн болодог суглаан (предвыборное собрание).