СЭР I

юум. н. 1) нойтон эдеэрэ, эдеэрэтэ нёлбоһон, бэдьхэ, мохи (мокрота, слизь): …Бэлигтын гэгшэ ехэ дурагүйгөөр хаража, нюуртань сэр сагаан нёлбоһоор билайса нёлбоод… (Ц. Дон); сэр мэнгир нойтон эдеэрэ, эдеэрэтэ нёлбоһон (мокрота, слизь): Һүүлшынгээ мүшхэбэри Семеновой хэхэеэ ерэхэдэ, Ган-Булад бүлинтэй шуһа сэр мэнгир хоёроо амаараа дүүрэн суглуулжа ерээд, улайха нюур хударынь била нёлбожорхёо гэхэ (Ц.-Д. Хамаев); сэр мэнгиргүй ханяадан хуурай, эдеэрэтэ нёлбоһогүй ханяадан (сухой кашель): Хүбүүндээ сэр мэнгиргүй ханяаданай эм абахаяа бү мартаарай; сэр мэнгиртэй ханяадан эдеэрэтэ нёлбоһотой ханяадан (влажный кашель); 2) хатуу хабдар, балсанай хатуурал, арһан дорохи хабдар, обогор хабдар (отвердение, затвердение, подкожная опухоль, желвак).