СҮМЭРХЭ

үйлэ ү. ямар нэгэ нюруу эбдэжэ, хахалжа, нүхэ гаргажа доошоо унаха, дарагдажа унаха, үмхиржэ унаха, хамхаран унаха, хамхарха (проламываться, проваливаться, обваливаться): Тайгын үбдэгсөө саһа махаха гээшэ гайтай – хүсэд хүрэжэ үрдеэгүй хүнгэрэг саһан ехэнхидээ бэе даажа шадангүй сүмэржэ, хүр руу һалтаасаа шахуу шаагдашанаб, тэмээшэлжэ гү, али хүльбэржэ байгаад бодоноб (С. Доржиев); сүмэрэн орохо ямар нэгэ хаалта гаталан орохо (врываться, вторгаться): Дайсан хүсыемнай хоёр болгожо таһалаад, гол дундуурнай сүмэрэн орожо, хоёр тээшэмнай хаха сохихо зорилго урдаа табяа бэшэ гү? (Ж. Тумунов); сүмэрэн унаха а) доошо унаха, хахаран унаха (проваливаться): Тэдэнэй сэдьхэлдэ … сэнхир ногоон дайда оёорһоо харлажа, гэнтэ сүмэржэ унахаяа байһан мэтэ һанагдажа, араһаань эжэ эхигүй хүйтэ даан, дагжа һүрэнэ (Х. Намсараев); б) ямар нэгэ юумэнһээ хажуу тээшэ унаха, халиха (вываливаться).