СУУРЯАТАХА

үйлэ ү. дууряатаха, соностохо, дуулдаха, дорьбохо, ойхо (звучать, резонировать, отдаваться – об эхе): Хашабаа шаргын нэгэ жэгдэхэн хахинаан, хурса туруунайнь саһа эсхэһэн абяан, мүн дулаан дахануудта орёолдон, шарга дээрэ һуугшадай бабаралдахань, сэлгеэн агаарта холо хүрэтэр сууряатана (Д. Эрдынеев); сууряатан хүнхинэхэ дүнгинэхэ, хүүехэ (гудеть, быть гулким): Сууряатан хүнхинэжэ байдаг гэрэлтэй һаруул энэ Актова зал соо Доржо олон удаа ороо юм (Ч. Цыдендамбаев); дабхаряатан сууряатаха хойно хойноһоо хоёр дахин дууряатаха (отдаваться двойным эхом): Манай оог хашхаралдаан үбэлэй сарюун агаарта заха хизааргүй ой тайгаар дабхаряатан сууряатана (С. Доржиев); наяран сууряатаха холо хүрэтэр нэжэгэнэсэ дуулдаха (слышаться раскатами – о громе): Ойро наярһан тэнгэриин дуун аяар саагуур, огторгойн заха хизаар туласа наяран сууряатан унтарна (Ч. Цыдендамбаев).