САГДАА

юум. н. 1) ниитын журам сахигша; журам сахиха зургаан (милиционер, полицейский; милиция, полиция): Минии таһаг соо иигэжэ байжа аашалаа һааш, сагдаае дуудажа асараад лэ, тушаажархиха байгааб (Ц. Шагжин); харьяата газарай сагдаа тодорхой газарта ажаһуудаг эрхэтэдэй эрхэ хамагаалха үүргэтэй полициин албанай түлөөлэгшэ (участковый уполномоченный полиции, участковый); 2) түүх. харуулшан, һахюул (стражник); сагдаа сэрэг харуул, һахюул (стража); 3) түүх. хаанта Россида хүдөө нютагай полициин эгээн доодо зэргэ (полицейский; городовой): Гэмтэй хүнүүдые галшын заабаряар хэһээхэ эрхэтэй, юрэнь, аба хайдагай үедэ томилогдоһон сагдаа гээшэ бэзэ (Б. Санжин, Б. Дандарон); 4) түүх. дотоодын сэрэгүүд, үндэһэтэнэй гварди (жандармерия, полицай).