НИИТЭ

1. тэмд. н. бүгэдын, бултанай, олоной, бүхы (общий, массовый, общественно-, обще-): Энэ бодолынь ямар нэгэн ниитэ удха оложо, элүүр хүнэй түлѳѳ тэмсэхэ, хэндэшье мэдэгдээгүй шэнэ арга, эмшэлгэ нээхэ урма зоригжол эмшэн хүбүүндэ түрүүлдэг (Д.-Д. Дугаров); – Сагай иимэ сошордолтой үедэ ниитэ политическэ, хүмүүжүүлхы хүдэлмэри тухайгаа мартанагүй аабзат (Д. Эрдынеев); 2. наречи бүгэдэ, булта, хамта, бүгэдэн, олон (весь, все); ниитэдэ мэдээжэ бултанда мэдэгдэнхэй (общеизвестный): С. С. Манжигеев – ниитэдэ мэдээжэ хүн. Дуунуудынь олон шагнагшадай дура сэдьхэл буляанхай гэхэдэ алдуу болохогүй (soyol.ru); ниитэ дээрээ бүгэдѳѳрѳѳ, һүрэгѳѳрѳѳ (всего, итого): Энэ Кяхта город дээрэ байһан сэрэгүүдэйнь тоо ниитэ дээрээ 500 хүн, буу зэбсэгээр ехэ һайн, ойлгоо гүш? (Г. Цыдынжапов); ниитэ зон бүгэдэ зон, булта хүнүүд (весь народ): Бадма-Базар Намсараевичай наһанайнь ажал хүдэлмэри, олоной түлэб оролдолго, ниитэ зондо туһатай хэрэг ябуулганууд ба эдэбхи үүсхэлнүүд тухайдань тодорхойлжо, юрэл бэшэнэ бэшэб (А. Жамбалон); ниитэ олон олон хүн зон (масса людей): Тиимэһээ Майдар иимэнүүд ниитэ олоороо суг хамта ажалда гаралгые һүүлэй үедэ оло эмхидхэнэ (Д. Эрдынеев).