МАГТАХА

үйлэ ү. һайшааха, гоёшоохо, һайн талыень тобойлгон харуулха, һайнаар хэлэхэ, ѳѳгшѳѳхэ (хвалить, восхвалять): Үзэг бэшэггүй, урдахи ажалаал хараад ябаһан хүниие энэ ехэ суглаан дээрэ хэнһээшье ехээр магтажа, ажалыень сэгнэжэ байһандань үбгэн уяраадшье, омогорхоодшье абана (С. Цырендоржиев); бэеэ магтаха а) ѳѳрынгѳѳ һайн талые тобойлгохо (хвалиться): Холын газарта ошоһон хайрата дүүгээ һанаһан хүлеэһэн тухайдаа хахад хуудаһа бэшээд, саашань Бадма ахань бэеэ магтажа орошоно (Ч. Цыдендамбаев); б) һайрхан һайзгайрха (бахвалиться): Энэ хүниие харахадаа, тэрэнэй милагар садхалан шарайда, омог дорюунаар бэеэ магтан татаһан аашада дураа гутаашье һаа, Ханда айһан шэнги боложо, хүнүүдэй саана хороодхино (Д. Эрдынеев).