ИНАГЛАХА

үйлэ ү. 1) дурлаха, эжэлшэхэ (любить): Хожомынь харюу абахадамни, тэрэ бэшэгыемни абажа, Ёндоной сэдьхэл амарһан шэнги болоошье һаа, инаглаха гуниглахань бүри хүсэтэй болоһон байгаа бэлэй (Ц. Дон); инаглажа дурлалсаха бэе бэедээ дуратай байха (любить друг друга); инаглан даллаха бэедээ татаха, дуудаха (ласково манить): Баһа тэндэ үнгэ бүриин һайхан сэсэгүүд уяхан эшээрээ урагша хойшоо найган надхан байжа, бишыхан Дондогые инаглан даллан байгаа һэн (Х. Намсараев); 2) энхэрхэ (ласкать): Серёжа, шамтай нэгэ хүнжэл доро инаглажа унтаһамнайшье хурга даран тооломоор ёһотой даа (С. Цырендоржиев); 3) нүхэсэхэ, хани барисаатай байха (дружить): Энээнһээ урда Дагбада болон ондоо ямаршье хүндэ дүтэлэн инаглажа үзѳѳгүй Аюур Дагбые хүзүүдэжэ, бэедээ няагаад, нэгэ хэды аниргүй һууба (Ц. Шагжин); инаглан нүхэсэхэ нүхэсэн таараха (дружить): Илангаяа оюун түгэлдэр мэргэдтэй эрэ эмэ бололсоһон мэтэ инаглан нүхэсэ. Мэргэн хүниие шүтѳѳ һаа, буруу замда орохогүй (Э.-Х. Галшиев).