ЗОРГОНДОО

наречи ѳѳрын дураар (по своиму произволу): Харин мүнѳѳ аяншадые али түбһэн аюулһаа аршалха хүн үгы, тэдэнэр ѳѳһэдынгѳѳ мэдэлдэ үгтэжэ, зоргондоо орхигдошоһон улад болоно ха юм (Б. Мунгонов); Зэрлиг шуурганай зоргондоо галзуурһан ордоһото ехэ хүсэндэ хайра гамгүйгѳѳр дайруулбашье, һарьдаг уулын ой модон тэсэжэл, тэмсэжэл байһан зандаа (Д.-Д. Дугаров); дура (гү, али эрхэ) зоргондоо, ага зол зоргондоо ѳѳрынгѳѳ дураар, мэдэрэлээр (самовольно, по своему произволу): Буусаяа урилhан жаахан хүбүүд үдэ болотор дура зоргондоо унтаад, гүмнѳѳ соо веялкэ эрьюулдэг эхэдээ ерэдэг hэн (Г.-Д. Дамбаев); Эрхэ зоргондоо ябадаг басаган наһаниинь иигээд дүүрэхэнь лэ (Б. Санжин, Б. Дандарон); Гарма зол зоргондоо ябадаг хүн; хара (гү, али дэмы) зоргондоо ямаршье ушаргүйгѳѳр, миин байжа байтараа (совершенно произвольно, ни с того ни с сего, без всяких оснований): Шэхэндэшни хара зоргондоо юумэ абяа гаража байдаг болошоболтой (Х. Намсараев); Дэмы зоргондоо архи уужа һууна гэжэ бү һанаарайгты (Б. Мунгонов); зоргондоо орошохо бэеэ һула табиха, журамаа алдаха (распоясываться, распускаться): Тулхабаагүй, зоргондоо орошоһон һамганһаа боложо, табан зуун табин түхэриг хармаанлажархёод, юухэн хүүхэнээшье мэдэхэеэ болишоод, гэлыжэ, арьяатанһаа хоргодоһон шандагандал, бэлтэлзэжэ һуухань һѳѳл таагүй, эшхэбтэрээр һанагдаба (С. Цырендоржиев); зоргондоо ааша дураараа бололго (произвол).