ДЭГДЭХЭ

үйлэ ү. агаарта хиидэхэ, дээшээ ниидэн гараха, ѳѳдѳѳ гараха (взлетать, подниматься): Тээ урдань хэдэн хирээ турлаагууд газарһаа дэгдэжэ, зариманиинь ойгуурхи модон дээгүүр һууба, нүгѳѳдүүлынь дээгүүр элилдэн байба (С. Доржиев); Зуһалангай гэрнүүдэй, сарайнуудай хоолойнуудһаа шэнгэхэн утаанууд гаража, нажарай дуулим үглѳѳнэй тунгалаг агаарта аалихан, залхуугаар дэгдэнэ (В. Гармаев); хуйлан дэгдэхэ шанга һалхинай эрьелдэн, мушхаран дээшээ хиидэхэ (вихриться, взвиваться): Хирэ хирэ һалхин хуйлан дэгдэжэ, үйлсын элһээр шэдэлэн, һая ногооржо эхилһэн модоной нюсэгэн шахуу мүшэр һалаануудаар наадан үнгэршэнэ (А. Жамбалдоржиев).