ДУРЛАЛ

юум. н. 1) инагай мэдэрэл, эрэгтэй эмэгтэй хоёрой хоорондохи мэдэрэл (любовь, влюблённость): Үнэхѳѳрѳѳ үндэр арюуншье, үнэн найдалтайшье дурлал, магад, хэзээ нэгэтэ Доржын зүрхэ сэдьхэлые хайлуулан уяраажа болохошье юм аалам? (Ч. Цыдендамбаев); үнэн дурлал жэнхэни дуран (настоящая любовь): – Үнэн дурлалые үзэхэ гээшэ жаргал (Д.-Д. Дугаров); 2) татаса, дүтѳѳр һаналга (любовь, привязанность): Эхэдээ, хүгшѳѳдэйдѳѳ абдар дүүрэн алта мүнгэ бэшэ, харин инаг түрэл хүбүүнэй илдам һайхан дурлал хүндэлэл асаржа ерэхэш (Ч. Цыдендамбаев); 3) хүсэл, һанаашарал, эрмэлзэл, алибаа юумэндэ абтаса (желание, стремление, склонность): Экскурсиин үедэ байгаалида дурлал түрүүлхэ, тэрээндэ гамтайгаар хандаха эрмэлзэл хүмүүжүүлхэ тон шухала (С. Содномов).