ДУРАСХААЛАЙ

тэмд. н. дурасхаалда зорюулагдаһан, һануулһан (памятный): Хэдэн үе сагуудта дурасхаалай турнирай хибэс дээрэ аха дүүнэр, эсэгэ хүбүүд барилдажа, мэдээжэ тамиршад болоһон (Э. Чимитдоржиев); дурасхаалай хүшѳѳ алибаа габьяата хүндэ гү, али үйлэ хэрэгтэ зорюулһан хүшѳѳ, дүрсэ, тусхай барилга, бэшэг, зураг һиилэһэн шулуун г.м. (памятник): Эсэгэ ороноо хамгаалгын дайнда унаһан сэрэгшэдэй мүнхэ дурасхаалай хүшѳѳ заһагдажа, хашаа хүреэнь шэнэлэгдээ (Б. Цырендоржиев); дурасхаалай үгэнүүд юрѳѳжэ хэлэгдэһэн үгэнүүд, захяа үгэнүүд (памятные слова): Эрхүүгэй университедэй багшанар, эрдэмтын шабинар дурасхаалай һайхан үгэнүүдээ хэлээ, Эрдэмтэ Рыгдылон тухай «Байкальская сторона» гэһэн журналда статья хэблүүлээ (Ц. Цырендоржиева); Дурасхаалай ном Агууехэ дайнда хабаадалсаһан, унаһан сэрэгшэдэй гү, али бусадшье зоной нэрэ мүнхэлһэн тобьёг-ном (Книга Памяти): Бэдэрэлгын ажалай дүнгүүдээр «Буряадай мүнхэ дурасхаалай номой» 8-дахи ботидо ороhон 97-дохи буудалгын дивизиин түүхэ hурагшадай ба багшанарай хүсѳѳр шэнжэлэгдэжэ, Эсэгын дайнда сэрэгшэдэй дайлалдаhан ябадалынь, дүрэ зурагуудынь, дайнhаа ерэhэн бэшэгүүдынь нэгэ доро суглуулагдажа ниитэлүүлэгдээ юм (В. Дашиева, Э. Оюун).