ДУРАСХААЛ

, дурасхал 1. юум. н. 1) һанаан, олоной гү, али ганса хүнэй һанаанда үлэһэн юумэн, үйлэ, хэрэг, ябадал, баатаршалга, габьяа, мэдээсэл г.м. (воспоминание, память): Нэгэ үүдэнэй хажууда зогсоноб… / тоншоод орохо гээд / дурасхаалайнгаа эрье дээрэ тогтошоод, / энэ үүдэнтэй холбоhон ушарнуудые hанажа эхилээб (Э. Зандраев); халуун дурасхаал сэдьхэлдэ һайнаар, эльгэндэ дүтѳѳр һанагдаһан юумэн (живое, доброе воспоминание); гэрэлтэ дурасхаал һаруул һайхан, арюун, хүндын дурасхаал (светлая память); мүнхэ дурасхаал хэтын хэтэдэ хадуугдан үлэхэ һанаан – һая наһа бараһан хүн тухай гү, али габьяата үйлэ хэрэг гү, али баатаршалга тухай (вечная память): Энэ габьяатнай мүнхэ дурасхаал болохо, би таанартаа тангаригланам (Х. Намсараев); дурасхаал мүнхэлхэ (гү, али мүнхэжүүлхэ) хэн нэгэн тухай гү, али ямар нэгэн үйлэ хэрэг тухай һайн һайхан сэдьхэл һанаанда зорюулжа хэмжээ ябуулга үнгэргэхэ, хүшѳѳ бодхоохо г.м. (увековечивать память, посвящать памяти кого-л., чего-л.): Нэжээд буудалгаар салют үгэжэ, хүбүүдэйнгээ дурасхаалые мүнхэлэебди! (Б. Шойдоков); 2) хүшѳѳ, али зэргын бодото гү, али үни үгы боложо ошоһон гээгдэһэн шухаг юумэн (памятник истории, культуры и т.п.): «Гэсэр Богдо хаан» болбол буряад арадай аман зохёолой гайхамшагта дурасхаал мүн. Улаан-Удэдэ соёлой дурасхаал болохо олон тоото байшан барилганууд бии юм; 2. тэмд. н. һанаанда үлэһэн, хадуугдаһан (памятный): – О-һоо, гоё дурасхаал тэмдэгтэй ха юмта, гэнэ Санданов (С. Цырендоржиев); дурасхаал бэшэг али нэгэн хүнэй ѳѳрынгѳѳ ажаябадал, үйлэ хэрэгүүд тухайгаа бэшэһэн зохёол (мемуары).