ДУРАДХАЛ

юум. н. мэдүүлэл, һанамжа (предложение): Зүгѳѳр ерэһэн үдэрѳѳ архи тамхяар тэмдэглэхэеэ һанаа бэшэ, харин эхэ нютагайнгаа эрхим сагаан эдеэ хоол бариха гэһэн дурадхал баранда дэмжэгдэбэ (Ц.-Ж. Жимбиев); дурадхал оруулха һанамжаяа хэлэхэ (вносить предложение): Унтахаяа байхадам, бригадирай манайда ороод, энэ дурадхал оруулхадань, би жаахан үхибүүндэл хүхишоо һэм (Ц.-Д. Хамаев); дурадхал зүбшѳѳхэ һанамжые баталха, дэмжэхэ (одобрять предложение): – Хэрбээ манай дурадхал зүбшѳѳжэ абахагүй байгаа һаа, арилагты һайн дээрээ, харин дураа гутаа хадаа таниие түрмэдэ һуулгажа, хархануудай хүнэһэн болгохобди (Б. Санжин, Б. Дандарон); дурадхалһаа арсаха һанамжые хүлеэн абахагүй, зүбшѳѳрхэгүй (отвергать предложение): Эрэ хүн аад, басаганай урилдая гэһэн дурадхалһаа арсажа байха аалби (А. Жамбалдоржиев).