ДУЛААСУУЛХА

үйлэ ү., идх. залог дулаа оруулха, ури оруулха, бүлеэсүүлхэ, халааха (согревать, нагревать): Үдэртѳѳ хүрэн алдаһан гэр бараагаа дулаасуулха гэжэ буланда обоолоотой түлеэгээр хоёр пеэшэнээ түлибэ (Ц.-Ж. Жимбиев); гараа дулаасуулха дулаа урьяһан юумэндэ гараа жүтэ болгожо шараха (согревать руки): Басаган тэрэ хонинойнгоо хушуунда нюураа няажа, хүзүүнһээнь аһалдан үндынэ, хүбхэгэр нооһон соонь хоёр гараа шургуулан дулаасуулна (Ц.-Ж. Жимбиев); сэдьхэл дулаасуулха баярлуулха, баясуулха, уяруулха (греть душу): Юундэ Пүрбын урин аад, хүйтэн, эдэ долгид шэнги, үгэнүүд, тэрэнэй сэдьхэл дулаасуулһан шэнги болоһон байгааб (А. Жамбалдоржиев).