ДОХЁО
юум. н. 1) тэмдэг, һэргылһэн абяан, хүдэлэсэ, зураг г.м. (сигнал, знак): Энэ хирэндэ ямар нэгэ түгшүүритэ ушар болоһоной дохёо татажа, уншарагтай утаар урамдаха газааһаа дуулдаба (Б. Санжин, Б. Дандарон); дохёо үгэхэ абяан, хүдэлсэ гү, али ондоо ямар нэгэн аргаар юумэн болохоёо байхые һэргылэн мэдүүлхэ (подавать сигнал, сигнализировать): Тагнуулшад эгээл энэ үедэ зогсогты гэһэн дохёо үгэбэ (Б. Шойдоков); дохёо татаха хууш. бүреэ татажа тэмдэг үгэхэ (подавать сигнал с помощью трубы): Тиихэдэнь Түшэгүүнэй үргѳѳгэй газаахи һахюулшан баһа дохёо татаа (Б. Санжин, Б. Дандарон); дохёо абаха а) бусадһаа мэдүүлгын, һэргылэмжын тэмдэг абаха (получать сигнал); б) буруу ябадалайнгаа түлѳѳ дээдэ тушаалтанһаан һэргылһэн мэдүүлгэ абаха, удаань ажалай талаар хэһээлтэ болодог (получать выговор); дохёо тэмдэг анхарал татаһан гү, али һэргылһэн хүдэлэсэ, абяан, зураг (знак, сигнал): Теодолидой шагаабшаар хаража байһан Таня тээ саахана хэмжүүрэй модо сэхэжүүлэн бодхоогшо Тогоошодо гараараа даллан дохёо тэмдэг үгэнэ (Д.-Д. Дугаров); абяан (гү, али абяагаар үгтэһэн) дохёо хоолойгоор, тусхай оньһон түхеэрэлгээр алибаа абяа дамжуулагдаһан тэмдэг дуун (голосовой сигнал); аюулай (гү, али түгшүүрилэй) дохёо аюултай юумэнэй дүтэлһые мэдүүлһэн абяата гү, али дүрсэтэ тэмдэг, һэргылэмжэ (тревожный сигнал): Ямаршьеб нюуса хүсэн – үхэл, һандарал асарагша агуу зэрлиг хүсэн – эндэ хоргодонхой, ходол бэлэн аюулай дохёо үгэжэ байдаг ёһотой (Д.-Д. Дугаров); утаһан дохёо хууш., хори телеграф (телеграф); 2) гомдол бариха гү, али хэһээхын тула ехэнхидээ даргада хандуулһан мэдүүлэл (сообщение, известие): Танай багша Намжал Бадмаевич архиин һогтуугаар ямаршье гэмгүй ябаһан колхознигые сохёо гэһэн дохёо намда ороод байна (К. Цыденов); дохёо мэдээн мэдээсэл, мэдүүлгэ (сигнал, известие): Почто зѳѳһэн энээхэн үе соонь арбаад айлда иимэ сошордомо дохёо мэдээн ерээ (Ц.-Д. Хамаев); 3) гар хонхо, сахилгаан хонхо (звонок): Доодо дабхарта дохёо хонхо наярбал ха (Ч. Цыдендамбаев); 4) хууш. монг. үгэ; зүб бэшэлгэ; хэлэн (слово; правописание; язык); дохёо танюулагша шастир хэлэнэй зүб бэшэлгэ тайлбарилһан зохёол; дохёоной бэшэг а) зүб бэшэхэ дүримэй һураха ном (грамматика); б) толи бэшэг (словарь).