ДАНСА

юум. н. 1) алибаа юумэ бүридхэн бэшэдэг дэбтэр, ном (книга учёта чего-л., реестр, ведомость, список): Демьян Многогрешный нюдэнэйнгѳѳ шэл зүүгээд, багса бүхэнииень анхаралтайгаар тооложо, иража байжа, дансада бэшэнэ, сэнгыень табина (Б. Санжин, Б. Дандарон); Урда ханаарнь ханын газетэ, элдэб зурагтай плакадууд, энэ фермын һү һаалгын данса үлгѳѳтэй (Ц.-Ж. Жимбиев); данса саарһан данса документнүүд (бумаги, документы): Бригадын захиргаанай хэрэгэй данса саарһа хаража болохо гү? (Б. Шойдоков); 2) алибаа юумэ үнэмшэлһэн гү, али баталһан бэшэгтэй саарһан (документ); нюур үнэмшэлһэн данса нюур нэрэ баталһан гол баримта бэшэг (документ, удостоверяющий личность): Нюур үнэмшэлдэг дансын тоодо Оросой Холбоото Уласай эрхэтэнэй паспорт, гадаадын паспорт, Оросой Холбоото Уласай сэрэгэй алба хэгшын нюурай үнэмшэлгэ ороно; тайлбари данса хуули эрхын болон биографическа мэдээ баримтые тодорхойлон бэшэhэн болон баталhан баримта бэшэг (справка): Гэр бүлын бүридэлэй тухай тайлбари данса хаанаhаа абадаг бэлэй?; дансын эрьесэ баримта бэшэгүүдэй бэшэгдэхэ гү, али абтаһан сагһаа гүйсэдхэгдэхэ гү, али эльгээгдэхэ хүрэтэрхи хүдэлэлгэ (документооборот): сахим дансын эрьесэ; хуурмаг данса үнэн бэшэ, хэмэл баримта бэшэг (фальшивый документ): хуурмаг дансаар хилын саана гараха.