ГОМДОЛ

юум. н. 1) муулар һайлар, голхорол, голхоролтой байлга, ямар нэгэн зохидгүй юумэндэ урмаа таһаралга (обида): Зай, иигээд бидэ дүрбэнэй хоорондохи гомдол тайлагдаба гээшэ… (Х. Намсараев); Тугаарайм гомдол гашуун һонгинодол нюдэн дээгүүрни саг зуурахан нёлбоһо гүйлгѳѳд, болишоһондол болобо (Ц.-Д. Хамаев); гомдол голхорол ямар нэгэн зохидгүй юумэндэ урмаа таһаралга (обида): Шамайе зол жаргалтай ушаруулхынгаа урдахана хуби заяаншни шамда дурлалай гомдол голхорол амасуулаа бэшэ аал даа? (Ч. Цыдендамбаев); гомдол муулар голхорол, муулар һайлар (обида): Энэ Должодынь Бадмында ошохо дурагүй, уйлана дуулана, эхэ эсэгэдээ гомдол муулар хэлэжэ байжа гутарна гажарна гэлсэгшэл һэн (Х. Намсараев); 2) голхорол, гашуудал, урмаа хухаралга, шаналалга (огорчение, сожаление, скорбь): Энэ дайнда хэды шэнээн олон арад зоной ами наһан алдагдаха байһыень һанахада, зосоо багташагүй гомдол түрэхэ байна даа (Х. Намсараев); гомдол уйдхар (гү, али гуниг) урмаа хухаралга (огорчение, сожаление): Нүхэдэймни нюур дээрэ гомдол уйдхарай тэмдэг һүүдэртэнэгүй (Ц.-Д. Хамаев); Гунгарай гомдол гуниг, ядарал зоболонгые хэн тооложо барахаб? (Ч. Цыдендамбаев); гомдол гашуудал дуулгаха сэдьхэлдэ таагүй юумэ дуулгаха (огорчать): Би шамда иимэ хэсүү гомдол гашуудал дуулгаха гэжэ эндэ ерээ бэшэб. Тиигээд һайн һайхан юумэ оложо хѳѳрэхэ гэхэдэ, хаана тиимэ юумэ мүнѳѳ сагта байха бэлэй (Х. Намсараев); гашуун гомдол урмаа ехээр хухаралга, этигэлээ алдалга (горькое разочарование): Заримдаа Доржодо ѳѳрынь һайн хүсэл эрмэлзэл гашуун гомдол асардаг (Ч. Цыдендамбаев); 3) муулараа дурдалга, гомдол барилга (жалоба, сетование): Дмитрий Иванович тэдэнэй гомдолые хашаргүй шагнаад, болохотой сэсэн зүбшэл үгэдэг, саарһа гуйлташье бэшэжэ туһалдаг юм (Ч. Цыдендамбаев); Тэдэнэй хүл доогуур урдаһан Карын горхоной урадхал оло мянган хүнэй гомдолоо шэбэнэлдэжэ байһандал адляар шалшаганана (Д. Батожабай); гомдолоо хѳѳрэхэ муулараа дурдаха, голхорхо (жаловаться, сетовать): Ѳѳрыень ерүүлжэ гомдолоо хѳѳрѳѳд, һанаагаа амаржа унташаһан, һэрихэеэ мартаһан һамгаяа харан һууна (Д. Эрдынеев); 4) хуули болон сүүдэй хэрэгтэ гуйлга, зарга, мэдүүлгэ (жалоба, претензия, апелляция): Василий Иванович ѳѳрынгѳѳ дайсан тухай нюуса гомдол бариха гэжэ шиидээд, тэрэ үдэртѳѳ арбаад хуудаһа бэшэбэ (Ч. Цыдендамбаев); гомдол гуйлга зарга, мэдүүлгэ (жалоба): Энэ байна, гомдол гуйлга бэшээ. Арбан долоон гэршэнэр гараа табяа (Ч. Цыдендамбаев); ○ гашуудал, гуйлга, муулар, уйдхар гэжэ үгэнүүдтэй парн. хэрэгл.