ГАТАЛХА

үйлэ ү. 1) уһа гараха, нүгѳѳ эрьедэ гараха, дабаха, дабажа гараха, үнгэрхэ (переплывать, переправляться, переходить, переваливать): Харахада тэгшэ сагаан тала аад, тэрэниие гаталха гээшэнь, буряад хүнэй үгэлдэг ёһоор, үйлын тама байдаг (Д.-Д. Дугаров); Урдажа байһан уһа гаталха, дүрэжэ байһан гал соогуур гараха зонта! (А. Ангархаев); 2) шэлж. дабаха, диилэхэ, тэсэхэ, дааха (преодолевать, переносить, выдерживать): Иихэдээ энэ хүбүүмнай эды жаахан наһандань ушарһан ехэ бэрхэшээлые гаталан гараба гээшэ (Ц.-Ж. Жимбиев); аюул тодхор гаталха бэрхэшээл дабаха (преодолевать трудности): Хамтадаа аюул тодхор гаталжа гараһандаа тиигэбэ хаш (А. Ангархаев); үхэхэ аюулые гаталха үхэхэ аюулһаа зайлаха, мултарха (избегать смерти): Врач тэрэнэй сохилхо бүреэ номгодожо байһан һудалые барижа үзѳѳд, лаб лэ үхэлэй аюулые гаталаа гэжэ һанахадаа урмашана (Ж. Тумунов); 3) гараха, дабаха, үнгэргэхэ (переваливать – о возрасте): Тэрэнэй арбан зургаа наһаяа гаталаад ябатарнь, үшѳѳ үхибүүн ажа ябадалдань эрид хатуу хубилалтанууд болоо бэлэй (Д. Эрдынеев).