ГАРАЛСАХА

үйлэ ү., хамтадх. залог 1) хамта ябалсаха, гарахадань нүхэр бололсохо (выходить вместе): Үглѳѳгүүр эртэ ударидагшаяа үдэшэхэ гэжэ Дугар Цэрэн-Ханда хоёр газаашаа гаралсаба (Б. Мунгонов); 2) ошолдохо, ошолсохо (вместе съездить): Нимын энэ мори асарха гэжэ ябахадань, Алханын обоо боложо, тэрэ үбдэг соорхой һарьмай үмдэтэйшье һаа, Алхана гаралсаа һэн (Ж. Тумунов); дуу гаралсаха хѳѳрэлдэхэ, хэлсэхэ (разговаривать): Үнѳѳрѳѳшье хаалтада һуужа байхадаа, Должон гэм хээд һуужа байһан бэшэ, хүнүүдээр огто дуушье гаралсадаггүй, уруу дуруу байдаг һэн (Ц. Дон); 3) хэсүү байдалһаа мултарха, арай шамай туйлажа үнгэргэхэ (с трудом выходить из положения): Тиигэжэ гаралсаһан зомди. Тэрэ үеын шууяа һанахадаа, мүнѳѳш зүрхэм үбдэдэг… (Д. Эрдынеев).