БЭШЭХЭ

үйлэ ү. 1) бэхэтэй гуурһаар, ручкаар, харандаагаар г.м. юумэ тэмдэглэхэ (писать): Таанад мүнѳѳ дээрээ бэхээр бэшэнэгүй ха юмта. Урид карандашаар бэшэжэ һурахат (Ц.-Ж. Жимбиев); буулгажа бэшэхэ хуулаха, хуулажа абаха (переписывать): Хэдэн удаа бэшэгээ буулгажа бэшэһэн, хэдэн удаа һанал хүсэлѳѳ сэгнэжэ үзэһэн байха (Ч. Цыдендамбаев); бэшэжэ абаха мартахагүйн тулада, бүридхэхын тулада саарһан дээрэ тэмдэглэхэ (записывать): Ши эндэ гансаараа бэрхэ, хуу бэшэжэ абаһан бэшэш (С. Ангабаев); хандажа бэшэхэ хандалгатайгаар гү, али гуйлтатайгаар бэшэг дамжуулха (обращаться с письмом); 2) уран зохёолой, эрдэмэй гү, али хүгжэмэй бүтээл зохёохо (сочинять, создавать): 1920 ондо Б. Б. Барадин «Чойжид хатан» гэжэ томо драма бэшэжэ, арад зондо харуулба (Г. Туденов); Жэшээнь, тэрэ залуу хүн нам тухай ямар муухай шүүмжэлэл бэшэжэ толилбо гээшэб (Ц. Шагжин); 3) ямар нэгэн баримта бэшэгтэйгээр хандаха, захяа эльгээхэ (письменно обращаться, посылать письмо): Июль һарын түрүүшын үдэрнүүдэй нэгэндэ гуйлта бэшэжэ, һайн дураараа дайнда мордоо һэм (Б. Шойдоков); 4) элдэб техническэ аргануудые хэрэглэжэ абяа хадагалха (записывать, фиксировать события или явления с помощью технических средств на материальном носителе): Би танай хэлэһэн үгые энэ магнитофон дээрэ хуу бэшэжэ абааб (Ц.-Д. Хамаев).