БОЛТОГОЙ

үйлэ ү. болог, бүтэг, болоһой, юумэнэй болохые хүсэһэн удхатай; имагтал үреэл, духаряа үргэлгын һүүлдэ хэлэгдэдэг (пусть будет! да будет!): – Үреэмнай хүлэг боложо, үри бэемнай айл боложо, ута наһатай, удаан жаргалтай һуухань болтогой! – гэжэ юрѳѳбэ (Б. Санжин, Б. Дандарон); Хэрэгни һайнаар бүтэхэ болтогой! – гэжэ аман соогоо дуугарба (Б. Санжин, Б. Дандарон); Майн нэгэн мандаха болтогой, манай гахай таргалха болтогой! (Совет үеын духаряа үргэлгын шогтой уряа); юрѳѳл (гү, али үреэл) болтогой танай хэлэhээр болог лэ, юрѳѳлые баталhан харюу үгэ (пусть сбудется благопожелание): – Юрѳѳл болтогой! – гэжэ Цоли гурбан хүбүүдээрээ зэргэ дабтаба (Ч. Цыдендамбаев); – Үреэл болтогой! – гэлдэжэ хундагануудаа нэшэлдүүлэн хашхаралдаад, захиралта хүлеэжэ һууһан шэнгеэр нэгэ доро уужархибад (Б. Мунгонов).