БОДОХО II

үйлэ ү. 1) хэбтэжэ гү, али һуужа байһан хүн, амитан болон юумэнэй дээшээ эгсэ болохо, үндыхэ (вставать, подниматься): Нэрэеэ дурдуулһан тэрэ студент хүл дээрээ бодоод, зал тээшэ хаража, намшагтай гоёор дохисогоогоод һууна (Ч. Цыдендамбаев); һуга харайн бодохо һүрэжэ хүл дээрээ тогтохо (вскакивать): Мансытай Балбарайнгаа бархирхадань, ѳѳрѳѳ Аламжа һуга харайн бодоод, үендѳѳ хүрэһэн хүбүүгээ гар дээрээ үлгыдэгшэ һэмнэй (Д. Батожабай); даб гэжэ бодохо һуужа гү, али хэбтэжэ байһанаа гэнтэ хүл дээрээ зогсошохо (резко вставать): Гэдэргээ шангаар түлхюулшэхэдээ тэрэ ухаа алдаад, урагшаа даб гэжэ бодохо забда үгэнгүйгѳѳр буулгажа оробо (Д.-Д. Дугаров); һэргэн бодохо хуушанайнгаа байдалда орохо (восстанавливаться); 2) унтаһанаа һэрихэ, нойрһоо һэрихэ (просыпаться): Гэрэй эзэн, бууралтажа ябаһан толгойтой, маряатай бүдүүн шарайтай, нюргаар набтаршаг хүн, һаяшаг бодоһон янзатай, сайлажа һууба (Б. Мунгонов); 3) буһалгаалха, эсэргүүсэхэ (восставать): Жибзэн-Дамба хутагтын Халха Монголой хаан болгогдон, хаан шэрээ эзэлһэнэйнь гол шалтагаан гэхэдэ, монгол арадай хариин дарлалтын урдаһаа эсэргүүсэн бодоһон тэмсэлэй аша үрэ ха юм (С. Норжимаев); 4) бодхуултаха, оргохо, хулжаха, тэрьелхэ (сбегать, дезертировать): Мүнѳѳ сагта сэрэгэй албанһаа бодохо ехэ олошорбо; 5) эхэ эсэгын зүбшѳѳлгүйгѳѳр хадамда гараха (выходить замуж без согласия родителей).