БАЯРЛАХА

үйлэ ү. хүхихэ, сэнгэхэ, бахархаха, баясаха (радоваться, веселиться, приходить в восторг): Оёортохи хайр шулууниинь тэрэ зандаа хашарһатан, энэ голой уһанай үлэмжэ сэбэр тунгалагта баярлана, бэеэ һайрхана шэнги (Д. Эрдынеев); баярлахын ехээр (гү, али гэдэһээ хаха, тэнгэридэ хүрэтэр) баярлаха хэмгүй ехээр, хизааргүйгѳѳр хүхихэ (безмерно радоваться): Тэндэ хоёрдохи жэлээ эмшэлүүлжэ байхадаа, гэртэһээ бэшэг түрүүшынхиеэ абажа, баярлахын ехээр баярлабаб (Д. Доржиева); Энэ бэеын зол хуби гээшэ гэжэ гэдэһээ хаха баярлажа һууна гээшэбди (Х. Намсараев); Үри бэеэ айл болгоод, нялсагар улаахан ашанараа тэбэрихэдээл, тэнгэридэ хүрэтэр баярлаха хүм (Б. Мунгонов); бүтүү баярлаха дотороо, һэмээхэн баясаха (радоваться про себя): Тэнгэри сэлмэхэнь гэжэ ажалдаа хам ороһон бригадынхид бүтүү баярланад (С. Цырендоржиев); баярлаһандаа дэбхэрхэ хүхиһэндѳѳ гүйхэ, ээрэмшээхэ (прыгать от радости): Баярлаһандаа дэбхэржэ ябаад, / Тэрээхэн сэсэгые тойрон ээрэмшээгээ бэлэйб (Д. Улзытуев); баярлаһандаа бахардаха хүхиһэндѳѳ яахаяашье мэдэхэгүй (растеряться от радости): – Шимни теэд баярлаһандаа бахардашаба гээшэ гүш? (А. Жамбалдоржиев).